ބިދޭސީންގެ ރައްކާތެރިކަމަށް، ރައީސް އަށް ހުޅުވާލެވިފައިވާ ސިޓީއެއް  

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަމާލުކަމަށް،

އަދަބު އިހުތިރާމާއެކު ދަންނަވަމެވެ. އދ. ދިގުރަށުގައި ބިދޭސީ މަސައްކަތްތެރިން ދިރިއުޅޭ އެކޮމޮޑޭޝަން ބްލޮކެއްގައި 31 މާޗް 6202 ވަނަ ދވަހުގެ ރޭ ދަންވަރު، ހިނގި ނުރައްކާތެރި އަލިފާނުގެ ހާދިސާގައި 5 މަސައްކަތްތެރިންގެ ފުރާނަ ގެއްލިގެން ދިޔަ ހިތާމަވެރި ޚަބަރަކީ މުޅި ޤައުމު ސިއްސުވާލި ކަމެކެވެ. މިއީ ހަމައެކަނި އިއްތިފާޤުން ހިނގާފައިވާ ހާދިސާއެއް ނޫންކަމާއި، މިއީ އަޅުގަނޑުމެންގެ ނިޒާމުގައި ހުރި އުނިކަންތައްތަކެއްގެ ސަބަބުން ދިމާވި ކަމެއްކަން ހިތާމައާއެކު ފާހަގަކުރަންޖެހެއެވެ.

މަނިކުފާނުގެ ސަރުކާރުން، ދިވެހިރާއްޖެއަކީ އިންސާނީ ހައްޤުތަކަށް އިހުތިރާމްކުރާ، އަމާން ޤައުމަކަށް، ހެއްދެވުމަށް ކުރައްވާ މަސައްކަތްޕުޅުގައި، ބިދޭސީ މަސައްކަތްތެރިންގެ ދިރިއުޅުމުގެ ހާލަތު އިސްލާހުކުރުމަކީ މިވަގުތުން ވަގުތަށް ކުރަންޖެހިފައިވާ ކަމެކެވެ. ރާއްޖޭގެ އިޤްތިސާދީ ތަނބުތައް ކަމުގައިވާ ފަތުރުވެރިކަމާއި އިމާރާތްކުރުމުގެ ދާއިރާގައި ރެޔާއި ދުވާލު މަސައްކަތްކުރާ މި މީހުންނަކީ، ރައްކާތެރި ބޯހިޔާވަހިކަމެއް ލިބުމުގެ ހައްޤު އޮތް ބައެކެވެ.

ސްޓްރެޓީޖިކް ރިޕޯޓް: ބިދޭސީ މަސައްކަތްތެރިންގެ ރައްކާތެރިކަމާއި އެކޮމޮޑޭޝަން މިންގަނޑުތައް އިސްލާހުކުރުން  

ހާދިސާގެ ފުންމިން: ތަކުރާރުވަމުންދާ ހިތާމަވެރި ސިލްސިލާ

ދިގުރަށުގެ ހާދިސާއަކީ އެކަހެރި ހާދިސާއެއް ނޫނެވެ. މިއީ މާލެއާއި އަތޮޅުތެރޭގައި ތަކުރާރުވަމުންދާ ނުރައްކާތެރި ސިލްސިލާއެއްގެ ބައެކެވެ.

މާފަންނު ނިރިފެހި (ގުދަން) ހާދިސާ: 01 މަސައްކަތްތެރިން ނިޔާވި މި ހާދިސާއަކީ ތޮއްޖެހިފައިވާ ތަންތަނުގައި ބިދޭސީން ބޭތިއްބުމުގެ ނުރައްކާ އެންމެ ބޮޑަށް ހާމަވި ކަންތަކެވެ.

ދިގުރަށުގެ ހާދިސާ: މީހުން ސަލާމަތް ކުރުމަށް ފާރު ތަޅަން ޖެހުމުން ސާފުކޮށް އެނގެނީ އެ އިމާރާތަކީ ކުއްލި ހާލަތެއްގައި ރައްކާތެރިކަމާއެކު ނިކުމެވޭނެ ގޮތެއް (އިމަޖެންސީ އެގްޒިޓް) ނެތް ތަނެއް ކަމެވެ.

މިހާރުގެ ނިޒާމީ މައްސަލަތައް:

ތަންފީޒީ ޤާބިލުކަން ނެތުން: ލޭބަރ ރިލޭޝަންސް އޮތޯރިޓީއަށް ޤާނޫނީ ބާރު ލިބިދީފައި އޮތް ނަމަވެސް، އެކޮމޮޑޭޝަންތައް ޤަވާއިދުން އިންސްޕެކްޓް ކުރުމުގެ އަމަލީ މަސައްކަތްތައް ފެންނާކަށް ނެތެވެ. މީގެ މައިގަނޑު ސަބަބަކީ އެކަށީގެންވާ ބަޖެޓާއި، އިންސާނީ ވަސީލަތްތައް ނެތުމުން އެއިދާރާގެ ތަންފީޒީ ޤާބިލުކަން ދަށްވުމެވެ.

މޮނިޓަރިންގ ފްރެގްމެންޓޭޝަން (މޮނިޓަރކުރުމުގެ ނިޒާމް ބައިބައިވެފައިއޮތުން): އިމިގްރޭޝަނާއި، އެލްއާރުއޭ، ފަދަ އިދާރާތަކުގެ މެދުގައި މަޢުލޫމާތު ބަދަލުކުރެވޭނެ ހަރުދަނާ ނިޒާމެއް ނެތުމުގެ ސަބަބުން، ރައްކާތެރިކަމުގެ މިންގަނޑުތައް އޮންނަނީ ހަމައެކަނި ކަރުދާހުގައެވެ.

ބައިނަލްއަޤުވާމީ މިންގަނޑުތައް

ބައިނަލްއަޤުވާމީ މަސައްކަތްތެރިންގެ ޖަމްއިއްޔާ އައިއެލްއޯގެ ރިކޮމެންޑޭޝަން (ލަފާ) ތަކާ އެއްގޮތަށް ރާއްޖޭގެ މިންގަނޑުތައް ބަދަލުކުރަންޖެހެއެވެ:

އިމާރާތާއި ބިނާވެށީގެ ރައްކާތެރިކަން: އިމާރާތަކީ އަލިފާނުގެ ހާދިސާތަކުން ރައްކާތެރިވުމަށް ބޭނުންވާ ފަޔަރ އެލާމް އާއި އިމަޖެންސީ އެގްޒިޓް ފަދަ ވަސީލަތްތައް ހުރި ތަނަކަށް ވުން.

ސިއްޙަތާއި ސާފުތާހިރުކަން: ސާފު ބޯފެނާއި، ނަރުދަމާ އާއި، އެކަށީގެންވާ ވައިދައުރުވުން ކަށަވަރުކުރުން.

ސިންގަޕޫރު މޮޑެލް: ރާއްޖެއަށް ގެނެވިދާނެ ބަދަލުތައް

ލައިސަންސް ހޯދުން ލާޒިމްކުރުން: ބިދޭސީން ބައިތިއްބާ ކޮންމެ ތަނަކީ ފަޔަރ ސޭފްޓީ މިންގަނޑަށް ފެތޭތޯ ބަލައި، ދައުލަތުން ދޫކުރާ ލައިސަންސެއް އޮންނަ ތަނަކަށް ހެދުން.

ގުޅިފައިވާ ބަލައި ފާސްކުރާ ޓީމް: މޯލްޑިވްސް އިމިގްރޭޝަން، ލޭބަރ ރިލޭޝަންސް އޮތޯރިޓީ، އެމް.އެން.ޑީ.އެފް ފަޔަރ އެންޑް ރެސްކިއު، މޯލްޑިވްސް ޕޮލިސް ސާވިސް، އަދި ހެލްތު ޕްރޮޓެކްޝަން އެޖެންސީ އެޗްޕީއޭ ގުޅިގެން ޤައުމީ ބަލާ ފާސްކުރާ ޓީމެއް އުފައްދައި، އަމަލީ ގޮތުން ތަންތަން ޗެކްކުރުމުގެ ޤާބިލުކަން އިތުރުކުރުން.

ނިންމުން: ސަރުކާރަށް ހުށަހަޅާ އިސްލާހީ ލަފާތައް

ކުރިއަށް އޮތް 90 ދުވަހަށް

ޤައުމީ ފެންވަރުގެ ސަލާމަތީ އޮޑިޓް: ރާއްޖޭގެ ހުރިހާ ބިދޭސީ އެކޮމޮޑޭޝަންތަކުގެ ފުރިހަމަ އޮޑިޓެއް 09 ދުވަހުގެ ތެރޭގައި ނިންމައި، މިންގަނޑަށް ނުފެތޭ ނުރައްކާތެރި ތަންތަން ވަގުތުން ހުސްކުރުމަށް އަމުރުކުރުން.

ވަގުތީ ބޯހިޔާވަހިކަން: ހުސްކުރެވޭ ތަންތަނުގައި ތިބޭ މަސައްކަތްތެރިން ވަގުތީގޮތުން ބައިތިއްބާނެ ރައްކާތެރި މަރުކަޒުތަކެއް ސަރުކާރުން ހަމަޖެއްސުން.

ހަރުކަށި ފިޔަވަޅު: މިންގަނޑަށް ނުފެތޭ ތަންތަނުގައި މީހުން ބައިތިއްބާ، ވަޒީފާދޭ ފަރާތްތަކަށް ބޮޑެތި ޖޫރިމަނާތަކެއް ކަނޑައަޅައި، އެފަރާތްތަކުގެ ކޯޓާ ހިފެހެއްޓުން.

ދުރުރާސްތާގެ ޕްލޭން

މަސައްކަތްތެރިންގެ އެކޮމޮޑޭޝަން ސިޓީތައް: އިންޑަސްޓްރިއަލް ރަށްރަށާއި މާލެ ސަރަހައްދުގައި، ހުރިހާ ވަސީލަތްތައް ހަމަޖެހިފައިވާ ޒަމާނީ އެކޮމޮޑޭޝަން ސިޓީތައް ބިނާކޮށް، ބިދޭސީން އާންމު ގެތަކުގައި ބޭތިއްބުން މަދުކުރުން.

ޑިޖިޓަލް ވަސީލަތްތަކުގެ އެހީގައި ބެލެހެއްޓުން: ކޮންމެ ބިދޭސީއަކު ހުންނަ ތަނަކީ ޖީ.ޕީ.އެސް މެދުވެރިކޮށް ޓްރެކްކުރެވޭ، ރަޖިސްޓްރީވެފައިވާ ތަނަކަށް ހަދައި، ތޮއްޖެހުން ކޮންޓްރޯލްކުރުން.

ޤާނޫނީ އިސްލާހު: ބިދޭސީންގެ ބޯހިޔާވަހިކަމުގެ މިންގަނޑުތައް ވަކި ބިލެއް ގެ ގޮތުގައި މަޖިލީހަށް ހުށަހަޅައި، އެކަމަށް ޚާއްޞަ ބަޖެޓެއް ކަނޑައެޅުން.

އިޚްލާޞްތެރިކަމާއެކު،

މުޙައްމަދު ދޮނޭ